8 Janar 2023

Është sfiduese të kuptosh saktësisht se kur filloi përdorimi i veshjeve nga njerëzit. Por arkeologët gjermanë besojnë se kanë gjetur provat e para që datojnë rreth 300,000 vjet më parë në epokën e gurit.

Arkeologët në Gjermani kanë zbuluar disa nga provat më të hershme të përdorimit të veshjeve,  që datojnë rreth 300,000 vjet më parë. Bëhet fjalë për veshje të prera nga lëkura e kafshëve parahistorike.

Zbulimi në Schöningen, Gjermania veriore, është emocionues sepse  pavarësisht nga përshkrimet e burrave dhe grave të shpellave të mbështjellë me gëzof në kulturën popullore,  shumë pak dihet me të vërtetë se si njerëzit e hershëm i mbijetuan dimrave të ashpër.

Leshi, lëkura dhe materiale të tjera organike zakonisht nuk ruhen më shumë se 100,000 vjet, që do të thotë se provat e drejtpërdrejta të veshjeve parahistorike janë të pakta.

“Studimi është i rëndësishëm, sepse ne dimë relativisht pak se si njerëzit në të kaluarën e thellë po mbroheshin nga të ftohtët. Nga kjo periudhë e hershme kohore, ka vetëm një pjesë të vogël të vendeve që tregojnë prova të lëkurës së ariut”, tha autori i studimit Ivo Verheijen, doktorant në Universitetin Tübingen në Gjermani.

Arinjtë e shpellës ishin kafshë të mëdha, afërsisht sa një ari polar, që u zhdukën rreth 25,000 vjet më parë. Veshja e ariut të shpellës, e cila ka qime të gjata të jashtme që formojnë një shtresë mbrojtëse të ajrosur dhe qime të shkurtra e të dendura që ofrojnë izolim të mirë, ishte e përshtatshme për të bërë veshje të thjeshta ose shtroja, sipas studimit të botuar në “Journal Of Human Evolution”.

Schöningen në Gjermani është më i famshëm për zbulimin e armëve më të vjetra të njohura prej druri – nëntë shtiza gjuajtëse, një shtizë shtytëse dhe dy shkopinj hedhës – që u përdorën për të vrarë gjahun 300,000 vjet më parë.

Nga Besmira Pelushaj